கிராம நிர்வாகத்தில் பயன்படுத்தும் சிறப்பு சொற்கள்

ஜமாபந்தி: வருவாய் தீர்ப்பாயம் (வருவாய்த்துறை சம்பந்தமான மக்களின் குறைகளை நீக்குதல்)

நன்செய்: பாசன வசதி கொண்ட நிலம்

புன்செய்: பாசன வசதி குறைந்த நிலம் அல்லது மழையை நம்பி விவசாயம் நடைபெறும் நிலம்

குத்தகை:

குறிப்பிட்ட ஒரு நிலத்தை அல்லது நிலத்தின் ஒரு பகுதியை பயன்படுத்தும் உரிமையை ஒரு குறிப்பிட்ட காலத்திற்கு மற்றொரு நபருக்கு அளிப்பது குத்தகையாகும்.

வில்லங்க சான்று:

ஒரு நிலத்தினை பற்றி அறிந்து கொள்ள அந்த நிலத்தை விலைக்கு வாங்குபவர் பெறும் ஆவணம். இது பதிவு துறையால் வழங்கப்படுகிறது. இதன் மூலம் மோசடி தடுக்கப்படுகிறது.

கிரயம்:  நிலத்தை ஒருவருக்கு விற்பனை செய்வது.

பட்டா:

குறிப்பிட்ட ஒரு நிலமோ அல்லது காலி மனையோ யாருடைய பெயரில் உள்ளது என்பதை குறிக்கும் வகையில் வருவாய்த்துறையால் வழங்கப்படும் ஆவணம். இது புத்தக வடிவிலோ அல்லது சான்றிதழ் வடிவிலோ இருக்கும்.

சிட்டா:

ஒரு நிலத்தின்  உரிமையாளரின் பயன்பாட்டில் உள்ள விபரங்கள் அடங்கிய ஆவணம். இது வருவாய்த்துறையால் வழங்கப்படும் ஆவணம்.

அடங்கல்:

ஒரு குறிப்பிட்ட நிலத்தின் பரப்பு சர்வே எண், பயன்பாடு, அந்த இடத்தின் அமைவிடம் போன்ற விபரங்கள் அடங்கிய ஆவணம் “அடங்கல்”.

புல எண்: நில அளவை எண்

விஸ்தீரணம்: நிலத்தின் பரப்பு

சுவாதீனம்: நிலத்தின் மீதான உரிமை

நத்தம் புறம்போக்கு:

அரசுக்கு சொந்தமான இடம் (தனிநபர் பயன்பாட்டில் இருந்த நிலம், குறிப்பிட்ட ஆண்டுகளாக வரை செலுத்தாவிடில் அந்த நிலம் புறம்போக்கு என அறிவிக்கப்பட்டு அரசு நிலமாக பதிவு செய்யப்படுகிறது.)

கிராம நத்தம்:

ஒவ்வொரு கிராமத்திலும் குடியிருப்புக்காக ஒதுக்கப்பட்ட நிலம்.

கிராம தானம்:

ஒரு கிராமத்தில் பொது பயன்பாட்டுக்காக (சத்திரங்கள், சுகாதார மையம் போன்றவற்றிற்கு) நிலத்தை ஒதுக்குவது கிராம தானம் ஆகும்.

தானம்:

நிலத்தை இனாமாக அளிப்பது

தேவதானம்:

கோவிலுக்கு தானமாக அளிக்கப்பட்ட நிலம்.

தேவதாசி இனாம்:

கோவில்களில் பணியாற்றும் பெண்களுக்காக வழங்கப்பட்ட நிலங்கள் (மனைகள்-வீடுகள்)

மகசூல் : விளைச்சல்

அனுபோகம்: பாத்தியதை (உரிமை)

ஆகரமணங்கள்: ஆக்கிரமிப்புகள்

ரயத்: விவசாயி

நமூனா: ரசீது (பதிவுத்துறையால் வழங்கப்படுவது)

பசலி: கிராமக் கணக்குகள் பராமரிக்கப்படும் முறை (பசலி ஆண்டு என அழைக்கபடுகிறது)

ஆயக்கட்டு: ஒரு பாசன ஆதாரத்திலிருந்து (ஆறு, குளம், கால்வாய்)  நீர் பெற பதிவு செய்யப்படும் நிலம்

கிஸ்தி-கெஸ்தி: நிலவரி (வயல், தோட்டம், மானாவாரி நிலங்களுக்கு செலுத்தப்படும் ஆண்டு வரி)

வாரிசு சான்றிதழ்: குறிப்பிட்ட சொத்தின் உரிமையாளர் இறந்து விட்டாலோ அல்லது 9 ஆண்டுகளுக்கு மேல் எந்த தகவலும் இன்றி காணவில்லை என்றாலோ அந்த சொத்தின் மீது அவருடைய வாரிசுதாரர்கள் உரிமை கொண்டாட அளிக்கப்படும் ஆவணம்.

+